اصل نام: عبدالرزاق
تاریخ پیدائش: 1951 ء موضع چلندراٹ پیل دھیرکوٹ باغ
شغل ہائے روزگار: صدر معلم (ر)
تصانیف: راز و نیاز (شاعری)، یہ ہوا کیا(شاعری)
خط وکتابت کا پتہ: بیکل ریسرچ اکیڈمی پی پی او جہالہ تحصیل دھیرکوٹ ضلع باغ آزاد کشمیر
نمائندہ شعر:
زمیں خود محوِ گردش ہے الٰہی
جہاں میں مشرق و مغرب کہاں ہیں
ہم پہ یہ ہوا فرطِ محبت کا اثر آج
ہر ظلم سے کرنا ہی پڑا صرفِ نظر آج
سائے مری آنکھوں کے تمہیں گھیر ہی لیں گے
آ جاؤ اِدھر، آؤ اِدھر، آؤ اِدھر آج
قربت نے شبِ ہجر کو دھمکی سی یہ دی ہے
ہم آپ تراشیں گے اُدھر اور ڈگر آج
نکلی ترے قدموں کے نشانات سے محروم
اجڑی ہوئی بستی کی ہر اک راہ گذر آج
بیکلؔ یہ اسی وقت کی کھیتی کا صلہ ہے
بویا تھا جو ”کل“ آپ نے اُس کا ہے ثمر آج
٭٭٭٭٭٭٭
کرتے جو عمر بھر رہے، دلدار احتیاط
نکلی تمہارے پیار میں بے کار احتیاط
مل پائیں وہ اگر سرِ بازار احتیاط
ہونے نہ پائے چاہ کا اظہار احتیاط
دیکھو جو غور سے تو ہیں، دیوار کے بھی کان
خاموش، ہوشیار، خبردار احتیاط
آئینِ عشق میں بس اب انکار کفر ہے
لیکن ہوا تو کیوں کہیں اقرار احتیاط
چھپنے نہ پائے حسن کے بیکلؔ اگرچہ وار
غیر ہو چکا یہ حالِ دلِ زار احتیاط
