الطاف عاطف

اصل نام: کیپٹن راجاالطاف عاطف

ولدیت: حسین خان

تاریخ پیدائش: 22 دسمبر 1950 ء کفل گڑھ تحصیل ہاڑی گہل ضلع باغ

تعلیم: گریجویشن پنجاب یونیورسٹی

شغل ہائے روزگار: آنریری کیپٹن ریٹائرڈ

تصنیف: جھیل کا چاند (شاعری)

زیر طبع: ایک غزلوں اور ایک نظموں کا مجموعہ 

ادبی حلقوں سے وابستگی: ایگزیکٹو ممبر طلوع ادب آزاد کشمیر، ممبر ادب آموز

تاریخ وفات:

نمائندہ شعر

لٹیرے اگر پاسباں ہو گئے

تو سمجھو کہ خالی مکاں ہو گئے

٭٭٭٭٭٭٭

لٹیرے اگر پاسباں ہو گئے

تو سمجھو کہ خالی مکاں ہو گئے

غمِ عشق کب رائگاں ہو گئے

کہ نامہرباں مہرباں ہو گئے

مصائب سے اپنے بڑھے حوصلے

عزائم غموں سے جواں ہو گئے

وہ اب بجلیوں کی نگاہوں میں ہیں 

جو تنکے مرا آشیاں ہو گئے

جنہیں ہم نے جانا تھا عاطفؔ رفیق

وہی دشمنِ جسم و جاں ہو گئے

٭٭٭٭٭٭

زندگی تو گزر گئی پُرنم

جیسے گزری بہار بھی پُرنم

تُو تھا خاموش میری حالت پر

آنکھ دشمن کی بھی ہوئی  پُرنم

ہنستے ہنستے بھی آنکھ بھر آئی

ایسی مجھ کو ملی خوشی پُرنم

غم کے صحرا میں زندگی اپنی

میں نے بھی تو گزار دی پُرنم

جھیل کا چاند جب سے دیکھا ہے

آنکھ رہنے لگی مری پُرنم

مانگ تو لوں دعا مگر عاطفؔ

آنکھ اپنی نہیں ابھی پُرنم